7 فوائد لـ الدش الساقع
كتب: أحمد حسين
في الشتا قرار إنك تاخد دش ده صعب، ما بالك بقى لو قررت تاخد دش ساقع كمان؟ ممكن ييجي في دماغك كل صور الارتعاش والميّه الساقعة نازلة على جلدك، وإحساس إن العضم بيتكتك في بعضه، وسنانك وهي بتخبّط في بعضها من البرد. وفي الصيف عند بعض الناس قرار إنهم ياخدوا الدش ده برضه بيكون حاجة صعبة .. عليهم وعلينا الحقيقة -_- كل المشاهد دي بقى اللي جت في كلامنا عن الدش الساقع سواء صيف ولا شتا بيقابلها فوائد مهمة للجسم ولحالتك المزاجية وللمجتمع، في حالة أخدت القرار وأخدت الدُش الساقع اللي بيُطلق عليه دش “جيمس بوند” أو الدش الاسكتلندي. هنا هنتكلم عن سبع فوائد منهم ذكرهم موقع «Medical Daily» الطبي.
1- زيادة اليقظة.. صحصح كده فوّق
الدش الساقع الصبح، وشعور التكتكة المُقلق المخيف، كل ده هيخلص بعد دقائق بسيطة، وهيفضل بس إن المخ يبدأ ينتبه كويس وبيفوق، لأن الصدمة اللي بتديها له الميّه الساقعة بعد دفا النوم، بتزوّد الأكسجين في الجسم، فنبضات القلب بتزيد، فالدم بينتشر في أنحاء الجسم كلها، ودي جرعة طبيعية وقوية من الطاقة غالبًا بنحتاجها في أول اليوم علشان مانروحش الشغل/ الجامعة/ المدرسة نايمين.
الفنانة والممثلة الأمريكية الشهيرة كاثرين هيبورن، قالت إنها طوال حياتهم ماتخلتش في يوم عن الدش البارد، وفي الأخر عملت إيه؟ كسبت 4 جوائز أوسكار أفضل ممثلة، لأن الصحيان بدري وتكون فايق، طريقك للأوسكار طبعًا.
2- تنعيم الجلد والشعر
حاجة كده زي إعلانات الصابون، بس دي بقى طريقة طبيعية للحفاظ على الجلد والشعر من التلف، لأن الميّه السخنة بتنشّف الجلد، لكن الدش الساقع بيساعد على غلق مسام البشر بإحكام، وده كمان بيمنع دخول أي شيء مُضر للجلد عن طريقها. دكاترة الأمراض الجلدية بيقولوا إن الميّه الساقعة بتمنع الجلد من التخلص من الزيوت الطبيعية المهمة اللي بتكون موجودة في فروة الرأس كمان، واللي بتخلّي الشعر أقوى وشكله أكثر لمعانًا.. آي لايك آيت.
3- تحسين المناعة والدورة الدموية
الدش الساقع بيحسّن الدورة الدموية عن طريق مد أعضاءنا وأجهزة جسمنا بالدم، وده ممكن يساعد في حل بعض المشاكل الخاصة بالجلد والقلب، وزي ما ذكرنا قبلًا، الميّه الساقعة بتعمل صدمة للجسم بتساعده على ضخ الدم بشكل أكثر كفاءة، ده بالضرورة بيعزز من صحة القلب بشكل عام، ده غير تقليل الإصابة بأمراض ضغط الدم وانسداد الشرايين، وتحسين نظام المناعة كله بشكل عام كمان.
4- يساعد في فقدان الوزن
آآآآه الدايت، الصخرة اللي بتتحطّم عليها أمال الحاجات، واللي في ناس بيقعوا عندها وبيقوموا وبيقدروا في النهاية يوصلوا للوزن اللي يكونوا مرتاحين له، إزاي الدش الساقع ممكن يساعد في عمل شاق زي ده؟ مبدئيًا محتاجين نقول إن في نوعين من الأنسجة الدهنية في الجسم، الدهون البيضاء والدهون البني، الدهون البيضاء دي بتتراكم لما بنستهلك سعرات حرارية أكتر من اللي جسمنا محتاجها، فالجسم بيخزّنها على هيئة دهون ومابيحرقهاش.
أما الدهون البني، فهي الدهون الجيدة اللي بتنشط علشان تحفاظ على حرارة أجسامنا بحسب مركز “جوسلين” لأمراض السكري، والتابع لكلية الطب بجامعة هارفرد. سنة 2009 اتعملت دراسة بتقول إن التعرض لأجواء البرد القارس بتحفّز الدهون البُنّية، وبحسب نتائج الدراسة دي، الشخص ممكن يفقد حوالي 4 كيلو في السنة، أيوة رقم قليل بس مع الحفاظ على الدش الساقع بجانب النظام الغذائي والرياضي هيبقى له نتائج حلوة.. هو حد طايل.
5- يساعد على التخلص من ألم العضلات
لو اتفرجت على فيلم رياضي، هتلاقي الممثل اللي عامل دور الرياضي -طبعًا- بياخد حمّام تلج، يعني مالي حوض الاستحمام (البانيو) تلج وقاعد جوّاه، ليه يعمل كده؟ علشان يتخلص من ألم العضلات اللي بيحصل في أثناء التمارين. سنة 2009، اتعملت تجربة على أكتر من 360 رياضي، وقاس العلماء مدى تأثير الدش الساقع على ألم العضلات، ولقوا إن 24 دقيقة استرخاء في حمّام بارد كانت فعّالة في التخفيف من ألم العضلات والتخلص منه.
6- يخفف الإجهاد
القفز في حمام سباحة الميّه بتاعته ساقعة، أو حتى ميّه البحر في الشتاء، بيساعدوا على التخفيف من حِدة الإجهاد على الجسم. في دراسة اتعملت سنة 1994 قالت إن التعرّض للميّه الباردة بتساعد على تقليل حمض اليوريك، وكمان بيحفّز مضادات الأكسدة إنها تفضل شغّالة بانتظام، وده انعكس على المشتركين في الدراسة، وكانت النتيجة إنهم تخلصوا من إجهادهم وتعبهم في وقت قصير.
7- ممكن يخفف من أعراض الاكتئاب
وحط تحت كلمة “ممكن” دي ألفين خط، إحنا ماقلناش هيعالجك من الاكيئاب. سنة 2008 اتعملت دراسة اقترحت إن الميّه الساقعة لو أخدت دش بيها ممكن تقلل من حِدة أعراض الاكتئاب، عن طريق إرسال نبضات كهربائية من نهايات الأعصاب الطرفية لحد المخ، علشان يعزز الحالة المزاجية ويعدّلها شوية، وده نتيجة للاستحمام بالميّه الساقعة لمدة لا تقل عن 3 دقائق.
لمزيد من المعلومات: بدائل مزيل العرق.. 5 بدائل طبيعية تفرفشك، وتنقذ الآخرين! 😀
