7 حاجات ابعد عنها وإنت داخل تنام
كتب: أحمد حسين
بالنسبة لي، مفش أحلى من نومة حلوة تديك طاقة لمواصلة الحياة، أيوه أقصد الحياة مش قصدي أبالغ في التعبير، لأن أنا بعتبر النوم ده أعظم تاني حاجة في الحياة عمومًا. المهم، إنه في أكتر من حاجة أغلبنا بنعملها قبل ما ننام، والحاجات دي بتأثر على النومة الحلوة اللي بنتمناها، وبالتالي ده بيأثر على حياتنا اليومية. دول أشهر 7 حاجات شائعة مفروض تبعد عنها وانت داخل تنام عشان تضمن نومة مريحة وهادية بشكل حقيقي.
1. استخدامك للموبايل
الضوء الأرزق والأبيض اللي بيخرج من الموبايل ده بيمنع المخ من إنه يفرز هرمون الميلاتونين، وده الهرمون اللي بيخلي جسمنا يحس إنه دلوقتي حان وقت النوم.
2. الأقراص المنوّمة
علماء/خبراء النوم بيقولوا إن بعض الناس بيحتاجوا فعلًا أقراص منومة علشان يقدروا بس يغمضوا عنيهم بشكل مُريح، لكن الأقراص دي غالبًا بيسببوا أعراض جانبية بتبدأ من آلام العظام، لحد فقدان الذاكرة.
3. شرب الكحوليــات
شرب الكحوليات ممكن فعلًا يساعدك على النوم، بس مش هيساعدك على النوم المريح. بعض الدراسات وجدت إن الكحوليات بتجعل النوم أصعب، لأن جسمك بيكون في حالة عدم راحة.
4. الشغل في السرير
يعني، هو الواحد غالبًا مابيصدق ينام علشان يرتاح من الشغل ويقدر يصحى اليوم اللي بعده ويشتغل، أو حتى لو بتحب شغلك، فأنت بتنام علشان تصحى فايق وواخد كفايتك من النوم وتعرف تشتغل، فمفيش أي داعي إنك تشتغل وإنت في السرير، السرير ده بيكون للنوم وبس.
5. الأكل الدسم
في لحظات كده من الجنون اللحظي، بتعدي على الواحد فبتخليه عايز يعمل حاجة غريبة، زي إنه مثلًا ياكل محشي الساعة 3 الفجر، وبعدها يحس إنه تقل من الأكل، فيدخل ينام. طبعًا الموضوع ده مش بس هيكبس على نفسك وهيخليك مش عارف تنام، ده كمان غالبًا هيصيبك بالسمنة المفرطة في وقت قصير. لو حسيت بعد كده إنك جعان في وقت متأخر، حاول تاكل حاجة خفيفة (زي الفاكهة مثلًا) أو اشرب عصير ولا حاجة، وابعد عن المحشي.
6. الكافيين بعد الساعة 3
طبعًا الكلام ده لمدمني الشاي والقهوة، اللي ممكن تطلب معاهم يشربوهم في أي وقت. في دراسة وجدت إن شرب الكافيين قبل النوم بحوالي 6 ساعات ممكن يلغبط النوم ويخليه مضطرب، والمشاركين في الدراسة اللي شربوا كافيين ناموا أقل من اللي ماشربوش بساعة، إيش حال بقى اللي بيشربوا كافيين بالليل أو قبل النوم على طول؟
7. تمارين قبل النوم مباشرة
بعض الخبراء نصحوا بإنه الأفضل لمحبي ممارسة الرياضة والتمارين، إنهم يمارسوا رياضتهم الصبح، مش قبل ما يناموا على طول. سبب الكلام ده إن حرارة الجسم بتعلى في وقت التمارين الرياضية دي، وده بيخلي الشخص عنده صعوبة في إنه يدخل مرحلة النوم. لذلك، نصح الخبراء بإنك لو حابب الرياضة لدرجة كبيرة ممكن تعمل تمارين بسيطة جدًا ماتخليش درجة حرارة جسمك تعلى أو أعتقد شخصيًا إنه لو ضروري تلعب رياضة قبل ما تنام أو ده الوقت المتاح ليك، فضروري تاخد دش ساقع يبرد درجة حرارة جسمك عشان تعرف تنام.
المصدر: businessinsider
