أفضل 13 مدينة ممكن ييجي لك شغل فيها في العالم كله!
كتب: أحمد حسين
بما إن حلم السفر أو خلينا نقول فكرة السفر بتراود كل سكان هذه المدينة، فبقى من المهم نعرف إيه الأماكن اللي الشغل فيها حلو، ما هو مش هيبقى هنا وهناك. طبعًا الموضوع له تقييمات وتصنيفات كتير، المرتب والمعيشة وحال البلد وغيره وحضرتك هتعرف تروح أصلا ول لأ ولنا في هذا قول آخر، بس إحنا دلوقتي هنتكلم على أكتر 13 بلد الشغل فيهم مريح، ومريح هنا بمعنى عدد ساعات قليلة، جو حلو، مكان لطيف، بعيدًا عن حسابات المرتب يعني. هنبدأ العد مع بعضينا من تحت لفوق.. يلا بينا 😀
أفضل 13 مدينة للعمل حول العالم
13. مدريد – أسبانيا
عدد ساعات العمل في مدريد 33.28 ساعة في الأسبوع، يعني لو قولنا إنهم في الأسبوع بيشتغلوا 5 أيام، يبقى عدد ساعات العمل 6.65 ساعة في اليوم الواحد. ده غير إنه من المعروف يعني، إن العاملين الأسبان بيحبوا يقيّلوا (بمعنى ياخدوا قيلولة) بعد الضُهر، علشان يتفادوا حرارة الشمس القوية، ودي حاجة بتقلل من عدد ساعات العمل طبعًا.
12. أمستردام – هولندا
عدد ساعات العمل 33.20 ساعة في الأسبوع، يعني في اليوم حوالي 6.64 ساعة، أقل من مدريد بدقيقة، بس من المعروف يعني، إنها من أكتر البلاد رخاءًا واسترخاءًا في أوروبا، فالناس هناك بيشتغلوا حوالي 1726 ساعة في السنة، وده أقل من المتوسط العالمي بـ 165 ساعة كإجمالي!
11. ميونخ – ألمانيا
عدد ساعات العمل 33.1 ساعة في الأسبوع، يعني في اليوم حوالي 6.62 ساعة. العاملون في المدينة البافارية، المشهورة بفرق زي بايرن ميونخ في كرة القدم، واحتفالات مهرجان أكتوبر، بياخدوا في السنة حوالي 29 يوم أجازة، وتعتبر برضه أقل مدينة في ألمانيا من حيث ساعات العمل يعني.
10. بروكسل – بلجيكا
عدد ساعات العمل 33.02 ساعة في الأسبوع، في يوم بقى 6.604 ساعة، وعلى الرغم من إن العاملين في بروكسل بياخدوا أقل عدد أيام الأجازات من أي مدينة تانية (18 يوم في السنة بس)، إلا إنهم قادرين يوازنوا بين العمل والحياة، وبيشتغلوا حوالي 1717 ساعة في السنة بس.
9. فيلنيوس – ليتوانيا
عدد ساعات العمل 33 ساعة في الأسبوع، في يوم 6.6 ساعة، والناس طول عمرها مبسوطة وبيعارفوا يوازنوا بين شغلهم ووقت فراغهم وأشياء حلوة كده.
8. لوكسمبورج – لوكسمبورج (برضه!)
عدد ساعات العمل 32.75 ساعة في الأسبوع، يعني 6.55 ساعة في اليوم. تعتبر لوكسمبروج واحدة من أصغر دول أوروبا، وبسبب الموضوع ده حاولوا يخلوا العمل شيء مريح جدًا، فخلوا الناس تشتغل 1703 ساعة في السنة بس، وعندهم كمان 31 يوم في السنة أجازة.
7. كوبنهاجن – الدنمارك
عدد ساعات العمل 32.64 في الأسبوع، يعني 6.52 في اليوم. قريب كان حصل تصويت كده في مكان ما، والناس اختارت كوبنهاجن كتاسع أفضل مدينة ممكن تعيش فيها على وجه الأرض. وده لأن المواطن العادي بيشتغل عدد ساعات أقل من المتوسط العالمي بـ 11.4%.
6. ميلانو – إيطاليا
عدد ساعات العمل 32.52 ساعة في الأسبوع، يعني 6.5 ساعة في اليوم. وعندما يتعلق الأمر بالعمل في إيطاليا، فميلانو هي الملاذ والملجأ. فالمواطنين هناك بيشتغلوا عدد ساعات أقل من المتوسط العالمي بـ 12%.
5. فيينا – النمسا
عدد ساعات العمل 32.27 ساعة في الأسبوع، يعني حوالي 6.45 ساعة في اليوم. الناس في العاصمة النمساوية الجميلة بيشتغلوا في السنة حوالي 1678 ساعة في السنة، وأجازتهم بتكون 27 يوم على مدار السنة.
4. هلسنكي – فنلندا
عدد ساعات العمل 31.91 ساعة في الأسبوع، يعني حوالي 6.38 ساعة في اليوم. الموظفين في هلسنكي بيشتغلوا بعدد ساعات أقل من المتوسط العالمي بـ 14%.
3. موسكو – روسيا
عدد ساعات العمل 31.66 ساعة في الأسبوع، يعني حوالي 6.33 ساعة في اليوم. بعيدًا عن البرد خالص، الناس في موسكو بيشتغلوا 1646 ساعة في السنة، ده غير إن أجازاتهم 31 يوم في السنة.
2. ليون – فرنسا
عدد ساعات العمل 31.36 ساعة في الأسبوع، يعني حوالي 6.27 ساعة في اليوم. يعني على الرغم من إنها تاني أفضل مدينة في العالم ممكن تشتغل فيها، إلا إنها مش أفضل مدينة في فرنسا حتى، ومع ذلك، الناس هناك بيشتغلوا 1630 ساعة في السنة بس، وأجازاتهم بتكون 28.5 يوم في السنة.
1. باريس – فرنسا
باريس وجمال باريس. عدد ساعات العمل هناك 30.84 ساعة في الأسبوع، يعني بيشتغلوا 6.16 ساعة في اليوم بس. حوالي كام ساعة بقى في السنة؟ 1603 ساعة في السنة، يعني بيشتغلوا عدد ساعات أقل من المتوسط العالمي بـ 18%، وعلشان كده، الناس مبسوطين في باريس.. ببساطة يعني.
المصدر:
