متحف ”موتر“: حيث يرقد مخ آينشتاين!
كتبت: مها طـه
ألبرت آينشتاين واحد من أهم علماء القرن العشرين، بيتمتع بشهرة كبيرة جدًا زي ما كلنا عارفين، حتى في الأوساط غير العلمية، مش بس لأنه حاصل على جايزة نوبل، ولا لأنه غيّر من مفهوم العالم عن الكون كله بنظرية النسبية، وقانون التأثير الكهروضوئي، لكن لأنه دايمًا كان مُثير للجدل، وأحد أهم الحاجات المثيرة للجدل في آينشتاين، هو مخـه!
أكيد في مرة سمعت الخرافة اللي بتقول إن مخك غير مخ آينشتاين، وده لأنك بتستخدم بس 10% من مخك في حين إن آينشتاين بيستخدم حوالي 90%، وطبعًا دي خرافة وكلام مش حقيقي، وممكن تعرف عنه أكتر من هنا: 11 خرافة عن المخ لازم تصححها عندك!
وفاة آينشتاين
يوم 18 أبريل ، الصبح، سنة 1955، توفى العبقري آينشتاين في مستشفى ”برينستون“ عن عُمر 76 سنة، وبناءًا على وصيته، تم حرق الجثة تاني يوم، لكن ”هانز“ الابن الأكبر لآينشتاين عرف إن الجثمان كان ناقص جزء، وخرجت صحيفة نيويورك تايمز بمانشيت الصفحة الأولى: ”المخ الذي عمل على نظرية النسبية وجعل من الممكن تطوير الانشطار النووي تمت إزالته من أجل الدراسة العلمية“!
متحف ”موتر“ هو المكان اللي ممكن تشوف فيه مخ آينشتاين، طبعًا مش هتشوفه بشكل كامل، لإنه متقسم على شرايح زجاجية للعرض في الصالة الرئيسية للمتحف، سُمك نسيج المخ على كل شريحة حوالي 20 ميكرون، مصبوغة وكأنها في وضع الفحص تحت الميكروسكوب.
الرحلة لم تنتهي بالموت
تقريبًا ولأن آينشتاين كان دايمًا مثير للجدل طول حياته، فكمان موته كان مثير للجدل. بعد موت آينشتاين قام الطبيب الشرعي ”توماس هارفي“ بتشريح جسمه وإزالة المخ من غير ما ياخد إذن أسرة آينشتاين، لكنه بعدها بفترة أخد موافقتهم على احتفاظه بالمخ، بشرط إنه يُستخدمه فقط لأغراض البحث العلمي.
بعد إزالة المخ، قام هارفي بحقن الفورمالين (50%) في الشرايين الداخلية للمخ، وبعد كده احتفظ بالمخ نفسه في محلول فورمالين (10%) داخل وعاء زجاجي، محفوظ في درجة حرارة منخفضة جدًا، وفضل محتفظ بيه لعقود. هارفي قام بتشريح المخ لـ240 قطعة، وعمل منها 1000 شريحة زجاجية من أنسجة المخ، عشان يتم فحصها تحت الميكروسكوب. دكتور هارفي بعت أجزاء من المخ للباحثين في جميع انحاء العالم.
مخ آينشتاين فعلًا مختلف
بعد ما العلماء والباحثين فحصوا مخ آينشتاين لقوا إنه مختلف شوية عن المخ الطبيعي، مخ آينشتاين ماكنش أكبر بالعكس ده كان أصغر من المعدل الطبيعي في البالغين. لما هارفي وزن مخ آينشتاين لقى إن وزنه حوالي 1230 جرام، في حين إن وزن مخ الشخص البالغ العادي حوالي 1400 جرام!
الباحثين لقوا كمان إن منطقة القشرة في المخ كان حجمها أكبر من الطبيعي بحوالي 15%، ومش بس كده لكن كمان كان مخه مختلف عن الطبيعي في حاجة تانية، وهي إن المخ الطبيعي بيكون مشقوق، لكنه عند آينشتاين مش كده، الأغرب هو بقى إن كثافة الأعصاب في مخ آينشتاين كانت أكبر بكتير من العادي، ده بالإضافة لزيادة الإتصال العصبي في منطقة القشرة المخية، ودي المنطقة المسؤلة عن المهارات الحسابية.
علماء الأعصاب قالوا إن الزيادة دي في الحجم هي اللي بتفسر زيادة مهارات التفكير في الرياضيات والفضاء وغيرها عند آينشتاين، كمان مخ آينشتاين ماكنش واضح عليه الآثار الطبيعية للتضرر اللي ممكن يحصل في خلايا المخ لراجل عنده 76 سنة، وبالرغم من كل الملاحظات دي، لكن مازال ولحد اللحظة دي، سرعبقرية آينشتاين لغز غامض!
دكتور هارفي أخيرًا تبرع بالأجزاء الباقية من مخ آينشتاين لقسم الطب الشرعي في مستشفى برينستون. والحقيقة إن متحف موتر أخد الشرايح الباقية الخاصة بمخ آينشتاين من ”لوسي رورك_آدامز“، كبيرة أطباء الأعصاب في مستشفى الأطفال بفيلادلفيا، وأستاذة علم الأمراض والأوبئة في جامعة ولاية بنسلفانيا.
آينشتاين ساب العالم بتاعنا بقى له أكتر من 60 سنة، ومع ذلك لسه ولحد من شهور فاتت مازالت نظرياته وصحتها بتثبت مدى عبقريته، واللي أكيد مش محتاجين للكلام عنها، لكن مخ آينشتاين مازال موجود فعلًا ولحد اللحظة دي، وده بسبب التصرف العجيب للطبيب الشرعي ”توماس هارفي“ اللي قرر إنه يسرق مخ آينشتاين ويحتفظ بيه ويدرسه، لمجرد إنه عاوز يكشف عن سر عبقرية آينشتاين.
ده فيلم تسجيلي علمته الـBBC عن مخ آينشتاين سنة 1994، واستعانت فيه بدكتور توماس هارفي نفسه للي يحب يعرف أكتر.
https://www.youtube.com/watch?v=kbzVZUk__eI
المصادر:
