فوتوسيشن لأهم 10 أجهزة كمبيوتر غيّرت العالم!
كتبت: مها طـه
كلمة كمبيوتر من حوالي 50 سنة كانت كلمة مش معروفة تقريبًا، لكن النهاردة مابقاش مجرد كلمة أو جهاز ده بقى جزء من الحياة محدش يقدر يستغنى عنه، لازم يكون جهاز الكمبيوتر موجود في البيت في الشغل وفي الشارع، ده إحنا حتى لما جينا نطور الموبايلات عملناها ”سمارت“ عشان تبقى كأنها كمبيوتر بين أيدينا.
”جيمس بيل“ مصور فوتوغرافي، بيحس دايمًا بانجذاب لأجهزة الكمبيوتر الأولى في العالم، دايمًا بيحب يشوف صورها على الإنترنت، لكنه كان شايف دايمًا إنها لازم تتكرم أكتر من كده، وتتصور بشكل أفضل بعيد عن الصور الأبيض وأسود التقليدية دي وده اللي خلاه يفكر في إنه يعمل للأجهزة دي زي جلسة تصوير كده.
”بيل“ قدم طلب رسمي عشان يقدر يصور الأجهزة دي، واللي كلها تقريبًا موجودة في متاحف، مشروع بيل كان قائم على فكرة إنه يصور الأجهزة دي بس بشكل جديد، بطريقة مختلفة عن اللي الناس عارفاه عن الأجهزة القديمة دي، اللي بتملى أوضة كاملة.
-
جهاز Harwell Dekatron:
وده جهاز كمبيوتر بريطاني، بيُعتبر من أوائل أجهزة الكمبيوتر في العالم، والقائم على فكرة التتابع واللي تم صنعه في الخمسينات، وزنه تقريبًا 2.7 طن! وحاليًا هو من ضمن معروضات المتحف الوطني للحاسبات. موسوعة جينيس للأرقام القياسية العالمية أعترفت بالجهاز ده كأقدم حاسوب رقمي في العالم للمرة التانية سنة 2013.
-
جهاز The Pilot ACE:
ده واحد من أقدم أجهزة الكمبيوتر اللي تم تصنيعه في المملكة المتحدة، تحديدًا في مختبر الفيزياء الوطني (NPL) في بداية الخمسينات. الجهاز ده كان واحد من أوائل أجهزة الكومبيوتر اللي بتخزن البرامج، واللي كان معاه في نفس الحقبة تصاميم تانية في المملكة المتحدة برضة زي (Manchester Mark 1 , EDSAC).
التصميم ده كان واحد من أقدم أجهزة الكومبيوتر العامة واللي صممه ”آلان تورنج“، بالرغم من إن آلان ساب معهد الفيزياء الوطني قبل ما الجهاز ده يكتمل. الجهاز ده كان بيُستخدم للقيام بالحسابات العلمية.
-
جهاز The IBM 1401:
الجهاز ده تم إنتاجه سنة 1959 لأول مرة، وبيُعتبر أول عضو في سلسلة IBM 1400 اللي نجحت بشدة، الجهاز ده كان بيتسهدف استبدال طريقة الجدولة بطريقة معالجة البيانات المخزنة على البطاقات المُثقبة. تم إنتاج حوالي 12 ألف جهاز من النوع ده، وفي بعض الدول فضل مُستخدم لحد التمانينات.
-
جهاز The IBM 729:
طريقة التخزين في الجهاز ده كانت الطريقة اللي بتشتهر بيها IBM، وهي طريقة الشريط المغناطيسي، واللي فضلت مُستخدمة من أواخر الخمسينات ولحد منتصف الستينات. الجهاز ده كان طول الشريط الغناطيسي فيه حوالي 731 متر، واللي كان بيبقى ملفوف على بكرات بقطر حوالي 26 سم.
-
جهاز The EAI Pac:
الجهاز ده بقى هو اللي تطورت منه بعد كدة أجهزة سطح المكتب (Desktop) واللي تم تصميمه وتصنيعه في أوائل الستينات، عرض الجهاز كان 1.2 متر، طوله 60 سم، وارتفاعه برضة حوالي 60 سم، ووزنه ما بين 145 – 192 كجم على حسب المكونات. الجهاز ده كان بيتعمل عشانه ترابيزة مخصوصة عشان تقدر تستحمل الوزن ده.
-
جهاز CDC 6600:
الجهاز ده بيُعتبر هو أول كمبيوتر عملاق ناجح، بأداء يوصل لـ3 ميجا فلوب، واللي كان بيحمل لقب أسرع كمبيوتر في العالم ما بين سنة 1964 و1969. الجهاز ده اللي عمله هو واحد من أساطير ورواد مجال الكمبيوتر ”سيمور كراي“. الجهاز ده دفع ”توماس واطسون“ المدير التنفيذي لشركة IBM وقتها، لإنه يبعت لموظفين الشركة ويقولهم إزاي يتخلوا عن الصدارة لأي حد، ويبقى أقوى كمبيوتر في العالم مش من إنتاج شركتهم.
-
جهاز ENDIM 2000:
وده جهاز كمبيوتر تناظري (Analog) كان مُصمم على نظام الأنابيب، تم تطوير الجهاز ده وتصنيعه في جمهورية ألمانيا الديمقراطية سابقًا، تم إنتاج حوالي 20 جهاز منه بس، وموجود لحد دلوقتي في متحف التكنولوجيا بمدينة درسدن الألمانية.
-
جهاز Meda 42TA:
وده كان واحد من أواخر أجهزة الكومبيوتر التناظرية واللي تم تصميمه في جمهورية تشيكوسلوفاكيا سابقًا، وتم استخدامه في اوائل السبعينات، لكنه ولحد النهاردة مازال موجود في بعض الدول في العالم.
-
جهاز HDR 75:
وده جهاز كومبيوتر صغير في الحجم وتناظري، تم تصميمه في جمهورية ألمانيا الديمقراطية سابقًا، في جامعة دريسدن للتكنولوجيا، واللي معروفة حاليًا باسم مركز خدمات المعلومات والحاسبات عالية الأداء.
-
جهاز ICL 7500:
الجهاز ده هو اللي أغلبنا نعرفه كجهاز الكمبيوتر القديم، لكن الحقيقة إن السلسلة دي من الاجهزة تُعتبر جديدة لأن بدأ العمل بيها بعد ما أنتجتها شركة ICL في المملكة المتحدة، خلال السبعينات.
الجهاز ده كان تقريبًا مماثل في الحجم لأجهزة الكمبيوتر العادية الموجودة حاليًا، لكنه ممتد بشكل أفقي. أجهزة ICL 7500 تم تصميمها عشان تناسب بيئات العمل المختلفة، عشان تناسب المكتب الصلب والخشب، وكمان كانت بتتصل بيه وحدات جانيبة عشان تساعد في أداء الجهاز لوظيفته.
في التمانينات كان الجهاز ده تطور وبقى متخصص أكتر وبقى يقدر يشغل أحدث الألعاب اللي كانت موجودة في الوقت ده، زي لعبة باكمان ولعبة غزو الفضاء.
المصادر:
