السرطان قد يكون مفاجأة ”شيكولاتة كيندر“ للأطفال!
كتب: أحمد حسين
من كام يوم كده، ظهرت أخبار كتيرة بتقول إن شيكولاتة كيندر اللي بتنتجها شركة (Ferreros)، فيها مادة ممكن تؤدي على المدى البعيد إلى الإصابة بالسرطان، وده اللي أعلنته منظمة ألمانية مستقلة غير حكومية اسمها ”Foodwatch“، وهي منظمة مختصة بمراقبة الأغذية بشكل عام، أُنشئت في ألمانيا سنة 2002.
شيكولاتة كيندر في موضع الاتهام!
منظمة ”Foodwatch“ حللوا 20 نوع من أنواع الشوكولاتة، ووجدوا إن في 3 أنواع منهم، بتحتوي على مادة اسمها ”الزيوت المعدنية الأروماتية – Aromatic mineral oils“، وهي مادة لها عدة مشتقات، أحد المشتقات دي (Mineral Oil Aromatic Hydrocarbons) أو (MOAH).
الزيوت الأروماتية دي في الأساس بتدخل في صناعة الشنط الورقية وورق الكارتون وأحبار الطباعة، وبتكون موجودة كمان في المواد الغذائية والحلويات المُصنّعة، بس بنسب قليلة بتحددها منظمات التغذية في العالم. اللي حصل بقى، إن منظمة (Foodwatch)، لما حللوا شيكولاتة كيندر، والنوعين التانيين اللي هما (Fioretto Nougat Minis) و(Sun Rice Classic Schoko Happen)، لقوا إن نسبة الزيوت في الأنواع التلاتة كانت أعلى من المسموح بيه.
اللي حصل بقى ساعتها، إن المنظمة طلبت من الشركات التلاتة، إنهم يسحبوا منتجاتهم من السوق، ويعدّلوها وبعد كده يبقوا ينزلوها السوق تاني. لكن الشركات ببساطة رفضت تمامًا إنها تاخد خطوة زي دي. ”جوناس هيج“، أحد العاملين بمنظمة (Foodwatch)، قال إن المادة دي خطورتها بتكمن في الأساس في إنك مابتقدرش تشوفها، ولا تتذوقها، بس بتتراكم في الجسم، وعلى المدى الطويل، ممكن تسبب الإصابة بالسرطان، خصوصًا وهي موجودة بنسبة أعلى من المسموح بيه.
ردت الشركات التلاتة المنتجة للشيكولاتة برفضها لسحب منتجها من السوق، مؤكدين إن الشيكولاتة بتاعتهم تم إنتاجها بشكل قانوني، يعني مفيش أي شبهة في إن الموضوع يكون متمرر بشكل غير قانوني. ده أثار استياء منظمة (Foodwatch) اللي ماسكتتش، وطالبت الناس إنهم يتوقفوا عن شراء الشيكولاتة دي تمامًا، بما فيهم كيندر طبعًا، لما تحتويه من نسب عالية من الزيوت المعدنية الأروماتية.
لكن على مايبدو إن الوكالة الألمانية للحلويات (The Association of the German Confectionary Agency) كان ليها رأي مختلف، فأصدرت بيان، قالت في بوضوح إن نسبة الزيوت المعدنية الأروماتية في شيكولاتة كيندر والمنتجات الأخرى غير ضار، ويمكن استهلاكه بلا قلق. وده طبعًا منح الشركات دي المنتجة للشيكولاتة مصداقية ما.
المشكلة دلوقتي بقى، إن المادة دي، بحسب منظمة التغذية الأوروبية EFSA، ممكن تؤدي للاصابة بالسرطان، يمكن مش على المدى القريب، بس على المدى البعيد ممكن تسبب الإصابة بالسرطان فعلًا، وكل سنة بيقللوا في النسبة المسموح بتواجدها من المادة دي في الأطعمة أكتر وأكتر. فسؤال ناكل الشيكولاتة دي ولا لأ؟ ده سؤال في حد ذاته صعب، لأنك في النهاية مش متأكد 100% من صحة كلام منظمة (Foodwatch) من حيث فكرة تعدي الشركات للنسب المسموح بيها من المادة دي، بس أنا _بشكل شخصي يعني_ بصدق في نظرية الاحتياط واجب خاصةً إن المادة دي في المطلق بتسبب سرطان على المدى البعيد، خاصةً الأطفال اللي استهلاكها عالي للنوع ده من الشيكولاتة.
المصادر:
