أحلام التوتر: أنا فاتني الامتحان؟ خير اللهم اجعله خير!

كتبت: يارا كمال

ممكن تصحى من النوم بليل خايف ومتوتر عشان الامتحان فاتك. تبص جنبك، تلاقي فيه ست نايمة، ثانيتين وتترجم إن دي أم العيال، وإنك نايم بالفانلة الحمالات وإن عيالك على وش جواز، وأنت فاكر إن امتحان الثانوية العامة فاتك 😀 فارجع نام يا أخويا واصحى بدري عشان مديرك لسه هيحط عليك وعيالك هيطلعوا عينك طلبات.

أظن إن الحلم ده من الأحلام الشايعة بين البالغين، تلاقي راجل حلو بشنبات كده وطالع في الحلم واقف على باب المدرسة بيعيّط، بغض النظر عن حلم الغوريللا اللي حلمنا بيه كلنا وإحنا أطفال.

مش ده الحلم الوحيد اللي الناس بتحلم بيه كتير، بس الأحلام دي ليها معنى وممكن تساعدنا نعرف أكتر عن مخاوفنا وأسباب قلقنا، لإن أحلام التوتر دي بتظهر في عقلنا الباطن لما مخنا بيبقى بيحاول يشتغل على مشكلة في ساعات الاستيقاظ.

وفقًا لدراسة اتنشرت في ”The Journal of Neuroscience“، الأحلام بتمثّل شكل الموجات الدماغية من ذكرياتنا. كل ما نفكر في موضوع ويرتبط عندنا بشعور معين، كل ما احتمالية إنه يورينا وشه الوحش في أحلامنا أكبر.

خلونا نتكلم عن أكتر 5 أحلام بيعبروا عن التوترات اللي جوانا ونعرف هما بيعبروا عن إيه.

أحلام التوتر :O

• اتأخرت عن الامتحان:

حلم زي ده قادر يخليك تقوم متلهوج، بدل ما تخسر مستقبلك عشان راحت عليك نومة، قبل ما تتنفس الصعداء وتدرك إن ده مجرد حلم.

الحلم ده بيميل لإنه يظهر في الوقت اللي بتبقى متوقع فيه حاجة مصيرية تحصل، وممكن يكون بيشير لإحساسك بإنك مش مستعد للتغييرات الكبيرة اللي بتحصل في حياتك.

• أسنانك بتقع:

فيه الحلم بتاع إن أسنانك بتقع أو بتتلخلخ. الحلم ده بيعبّر عن قوتك الشخصية، وبيدل على إنك حاسس بفقدان السيطرة على حياتك.

• التعري قدام الناس:

تبقى واقف في أي موقف طبيعي جدًا وبعدين تلاقي نفسك عريان قدام الناس. حلم مزعج جدًا ومحرج طبعًا. الملابس بتمثّل الحاجة اللي بتسترك وبتحميك من باقي الناس، وبالتالي التعري بيعبر عن مشاعر العار وإن مكشوف وضعيف. ممكن كمان يبقى بيعبّر عن القلق من الحميمية داخل أو خارج أوضة النوم.

• المطارد:

شربت كوباية اللبن الدافي، وفجأة بقيت أحمد زكي في فيلم ”الهروب“. فيه ناس بتجري وراك وعايزين يقتلوك أو يأذوك. ده معناه إن مخك بيشتغل على مشكلة أو بيحاول يتجنب حاجة كبيرة في حياتك الحقيقية. الحلم ده ممكن يساعدك على مواجهة المشكلة اللي شاغلة دماغك ليل نهار. اللي هو مش عارفة اعمل لك حاجة في الحقيقة، طب تعالي لي في الحلم بقى.

• فقدان السيطرة أثناء السواقة:

تبقى سايق العربية في أمان الله وفجأة تلاقيك مش عارف تسيطر على الدريكسيون والعربية عمالة تيجي يمين وشمال. الحلم ده معناه شبهه، وهو إنك فاقد السيطرة على طريقك للنجاح.    

المصدر:   medicaldaily