
لغز التيركس T-REX: الديناصور الأكثر رعبًا على الأرض
كتبت: مهـا طـه
معرفة الماضي ودراسته عملية صعبة وأحيانًا بتبقى صعبة أوي لأن العالم من دول بيستني يحط فرضيات ويحاول يدور على أدلة تدعمها، وأحيانًا لازم يستنى كشف علمي معين عشان يقدر يثبت أو يجاوب على اللي بيدور في دماغه. وكما اهتم البشر بنشأة الكون وبداية الحياة على الكوكب، اهتموا كمان بالكائنات اللي كانت عايشة من ملايين السنين ومن قبل ظهور الإنسان حتى على الأرض.
أحد أهم الكائنات اللي كان ومازال البشر بيحاولوا يعرفوا عنها هي الديناصورات، اتعملت أفلام عنها وحاول علماء يتخيلوها ويعيدوها تاني للحياة ويفسروا أسباب انقراضها. أحد أشهر الديناصورات في العالم هو الـT-REX أو التيرانوصور. بس يا ترى إيه سبب إنه الأشهر بالنسبة لنا؟

التيركس: متربع على عرش الديناصورات
معروف باسم التيرانوصور،تم تصنيفـه كملك للديناصورات، مش هو الأكبر من بين الديناصورات، بالعكس طوله كان لا يتعدى 13 متر، ووزنه كان حوالي 7 طن، لكنه كان كائن مفترس من الدرجة الأولى _آكل لحوم_ على عكس معظم أنواع الديناصورات اللي كانت آكلات عشب. ده بيقدر يعض فريسته حتى من خلال العضم!
وهنا كان السؤال اللي دايمًا بيقف العلماء قصاده؛ إزاي التطور خلق كائن رائع بالشكل ده؟ لدرجة تخلينا نعتبره واحد من أكبر الحيوان المفترسة اللي عاشت على سطح الأرض. فضلت إجابة السؤال ده لغز لفترة طويلة لحد ما ظهرت أنواع جديدة من التيرانوصورات في أوزبكستان، واللي اعتبرها العلماء أبناء عم للـT-REX لكنها أصغر وظهرت قبل ظهور الـT-REX. الاكتشاف ده قدم أدلة قوية على التاريخ التطوري للـT-REX… ما تيجوا نشوف
”تيمورلينجيا“ ابن العم الغائب
النوع اللي اكتشفوه في أوزبكستان اسمه (Timurlengia euotica) وده نوع من التيرانوصورات اللي عاش على الأرض من حوالي 90 مليون سنة، وفي الوقت ده كانت أوزبكستان عبارة عن متاهة كبيرة من الغابات والأنهار.عظام التيمورلينجا تم جمعها على مدار 10 سنين من صحراء أوزبكستان، واللي بتعتبر من أكتر الأماكن جفافًا في العالم حاليًا.
فريق البحث كان بيقوده ”ألكسندر افيريانوف“ و”هانز ديتر“، ونشروا اكتشافهم ده في ورقة بحثية في الأكاديمية الوطنية للعلوم. أهمية الاكتشاف ده ترجع لكونه أول تيرانوصور يتم اكتشافه عاش في منتصف العصر الطباشيري (منذ 145 – 65 مليون سنة). قبل الاكتشاف ده كان في فجوة من الزمن حوالي 20 – 30 مليون سنة غايبة من السجل الأحفوري، بتخفي اللحظة اللي تحولت فيها الكائنات المفترسة العادية لكائنات مرعبة واستثنائية بالشكل ده.
مرحلة جمع الحفريات بتبقى أشبه بلعبة الـpuzzle، عظام بتتجمع جنب بعضها بترتيب معين لحد ما توصل للشكل النهائي أو شبه النهائي للكائن ده. الهيكل العظمي للتيمورلينجيا كان فيه الفكين والمنقار وبعض الأسنان وبعض فقرات الرقبة والظهر الذيل، وشظايا من الأيدين والقدمين. كل العظام دي فالأخر وصلت العلماء لصورة عنه.
طول يتراوح بين 3 لـ4 متر، والوزن ما بين 170 – 270 كجم، تقريبًا في حجم حصان كبير.
التيمورلنجيا كان كائن مفترس لكنه مش بنفس درجة التيركس، وحتى ماكنش على قمة الهرم الغذائي وقتها، واللي كان بيحتلها في الوقت ده الـ”ألوصور“. يعني ببساطة كان بيتهاجم عادي من كائنات أقوى منه ومفترسة أكتر.
بفحص جمجمة التيمورلنجيا لقوا إنها تمامًا زي الموجودة في التيركس. تكوين الجمجمة عند التيمورلنجيا كان دليل كمان على إنه كان كائن ذكي جدًا، والأذن عنده بتقدر تميز الأصوات اللي ترددها منخفض، المميزات اللي كان العلماء بيعتقدوا إنها بتميز الـT-REX فقط، وإنها أحد أسباب قوته وتربعه على عرش الديناصورات.
التيركس: قصة التطـور
“التيرانوصور الأوزباكي الجديد” هو الديناصور اللي ساعد في تصور القصة الكاملة لتحوّل الحيوانات العادية لحيوانات استثنائية موجودة في الطبيعة.
التيرانوصورات نشأت من حوالي 170 مليون سنة خلال العصر الجوراسي (منذ 200 – 145 مليون سنة). في الوقت ده عاشت التيرانوصورات اللي حجمها تقريبًا في حجم الإنسان، وبتستخدم إيديها الطويلة في القبض على الفرائس، لكنها كائنات عادية مش مثيرة للرعب بالمرة، واستمر الوضع ده لحوالي 80 مليون سنة.
بعدها بعض الأنواع الصغيرة من التيرانوصورات دي تطورت من حيث المخ الحواس، وده عشان تقدر تتعقب الفرائس بشكل أفضل، الحقيقة إن التطور العصبي الحسي ده استفادت منه التيرانوصورات جدًا، وخصوصًا مع انقراض الـ”ألوصور“ من حوالي 80-90 مليون سنة.
انقراض الألوصور كان بمثابة اختفاء لقمة الهرم الغذائي في الديناصورات المفترسة، وعشان كده أكتر الكائنات تطورًا وقتها هي اللي قدرت تحتل مكانه. وبفضل ذكائه وحواسه الحادة تربع التيرانوصور على قمة المفترسات.

بمجرد ما انقضّت التيرانوصورات على عرش المفترسات تطورت بسرعة لحد ما وصلت لشكل أشبه للوحوش. أوزان أكتر من الطن طول أكبر من 7 متر برؤوس وكأنها آلات للقتل، وكانت النتيجة هي التيركس T-REX.
من حوالي 80 مليون سنة كانت التيرانوصورات دي بتحتل أمريكا الشمالية وآسيا، وانتشروا في جميع النظم البيئية اللي كانت موجودة على الأرض وقتها.
وبعدها بحوالي 15 مليون سنة كان التيركس بقى فعليًا متربع على قمة الهرم الغذائي، كائن مدمر مرعب بيُعتبر كأشرس مفترس على الأرض، لحد ما سقط المُذنب اللي أنهى قصة الديناصورات تمامًا من على الأرض، وده أحد الاحتمالات الأقرب لتفسير انقراض الكائنات الضخمة العظيمة المرعبة دي.
المصادر: theconversation1 scientificamerican bbc.co.uk sci-news