ليه وإزاي؟

أكّلوه بدل ما يولع فينا!

كتبت: يارا كمال

عندك النوع من الأصحاب اللي لو جاع ومافيش أكل جاهز بيبقى متعصب ومش طايق حد، وناقص يقوم ياكل دراعك؟ فاكر فؤاد المهندس في فيلم ”عائلة زيزي“ لما كان متعصب أوي عشان أخواته لسه مرجعوش وفاضل على معاد غداه دقايق والأكل محطوط ع السفرة بس لازم يستنى البهوات؟

الناس دي غلابة والله. أصل مخهم هو اللي المفروض يُلام في الموضوع ده، يعني هما مش مفجوعين ولا حاجة. الحالة دي ليها تعبير بالإنجليزي: ”Hangry“ يعني الواحد منهم فيها بيجمع بين إنه Hungry أو جعان وإنه Angry أو غضبان.

Hangry

الفكرة إن المخ بيحتاج وقود عشان يقدر يتحكّم في المشاعر، والغضب هو أكتر شعور يصعُب التحكم فيه. الوقود الأساسي بالنسبة للمخ هو الجلوكوز، اللي جسمنا بيصنّعه من الأكل. والمخ أصلًا عضو طلباته كتير، يعني برغم إنه بيمثل 2% بس من وزن جسمنا، إلا إنه بيستهلك من 20% لـ 30% من الطاقة اللي بنستهلكها. فهو قِلة كده بس جبار.

طيب إشمعنا مزاجنا بيتأثّر على المِسا كده، برغم إننا  ممكن نصحى الصبح ونبقى قاعدين ليلة من غير أكل بدون ما ده يأثّر على مزاجنا؟

إجابة السؤال ده ببساطة إن القدرة على التحكم في النفس بتبتدي تقل على آخر اليوم، زي ما بنبدأ اليوم متحمسين وعلى آخره بنبقى مش طايقين نفسنا.

أكتر ناس بيتأثروا بمزاجنا السيء وقت الجوع هما الناس القريبين مننا واللي إحنا بنرتاح لهم. ”دكتور براد بوشمان“، أستاذ علم النفس في جامعة ولاية أوهايو، عمل بحث وصل فيه لإن لو فيه شريكين (اتنين بيحبوا بعض، مخطوبين، متجوزين) مش واكلين كويس (أي محرومين من الجلوكوز) ممكن يهبوا في وش بعض ويعلّوا صوتهم أكتر من اللي واكلين كويس. يعني ممكن تضرب خناقة لرب السما لمجرد إنك جعان.

hangry-time-peter-oumanski

الموضوع معقّد عن كده. المشكلة إن الهرمونات اللي بتحفّز الشهية بتوصّل إشارة لمخك إن ده وقت الأكل، وكمان بتحفّز مناطق في المخ مرتبطة بالضغط والقلق، عشان كده لما بتحس بضغط، بتبقى عايز تاكل حاجة تديك طاقة زي الأكل الجاهز السريع اللي كفيلة تودي الوزن في داهية يعني.

كمان الموضوع ليه دعوة بالتطوّر. باعتبار إن الإنسان حيوان في الآخر، والحيوان لما بيجوع بيحس بقلق ومزاجه بيتعكّر، لحد ما يرضي الحاجة دي. ممكن يكون الموضوع في الإنسان أقل بس فينا منهم برضه.

بس في الآخر، المضوع بيختلف من حد للتاني، يعني أنت ممكن تبقى جعان وقاعد هادي جدًا وصاحبك مش على بعضه. لو أنت من النوع اللي الجوع بيعصّبه، هات لك أي تصبيرة تاكلها على بال ما الأكل ييجي. أنصحك، عشان ماتخسرش اللي حواليك.


المصادر:

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق