.
هجص بلدي

5 خرافات عن ألزهايمر يبعده عن السامعين!

كتبت: يارا كمال

إيه الكلمات اللي ممكن تيجي في دماغك لو جت قصادك سيرة ألزهايمر؟ الشيخوخة مثلًا؟ فقدان الذاكرة؟ يمكن الحاجتين دول بالذات مرتبطين بألزهايمر، بس ده معناه إننا معندناش معلومات كفاية عن المرض. خلونا نعرف ايه اللي بيتقال من خرافات عن ألزهايمر ونصححها.

5 خرافات عن ألزهايمر يبعده عن السامعين!

خرافات عن ألزهايمر

الخرافة الأولى: ألزهايمر بييجي لكبار السن بس

أغلب المصابين بألزهايمر سنهم 65 فما فوق، بس ده لا يعني إن الناس اللي أصغر من كده سنًا مابيصابوش بالمرض ده. فيه حوالي 5% من الناس المصابين بألزهايمر بتيجي لهم أعراضه في التلاتينات والأربعينات والخمسينات من عمرهم، وده اللي بيسموه مرض ألزهايمر المبكر.

وغالبًا الناس اللي بيعانوا من المرض ده في وقت مبكر بياخدوا وقت طويل على ما حالتهم تتشخص بشكل دقيق، لإن احتمالية إن ده يحصل مش كبيرة، عشان كده الأطباء بيفتكروا إن أعراض المرض زي فقدان الذاكرة بتكون بسبب الضغط العصبي مش أكتر.

وممكن يكون ألزهايمر المبكر حاجة جينية. العلماء بيعتقدوا إنه بيتضمن انتقال واحد من 3 جينات نادرة من أحد الوالدين.

الخرافة الثانية: أعراض ألزهايمر جزء طبيعي من الشيخوخة

خرافات عن ألزهايمر

بصوا، قليل من فقدان الذاكرة جزء طبيعي من الشيخوخة، لكن أعراض ألزهايمر غير كده، يعني بيكون نسيان بيتعارض مع الحياة اليومية أو التوهان. يعني أنت ممكن من وقت للتاني تنسى أنت حطيت مفاتيحك فين، بس مش طبيعي إنك تنسى بتسوق إزاي لمكان زي بيتك أو مكان بتروحه كتير أو إنك تنسي مثلًا إحنا في أنهي فصل من فصول السنة زي عاطف كده في فيلم ”الناظر“.

ألزهايمر مش مجرد النسيان البسيط المرتبط بالشيخوخة، لأ ده بيسبب تدهور في وظايف المخ تخليه يسرق من المريض قدرته على التفكير والأكل وكلام وغيره. يعني ألزهايمر ده مرض مش مجرد جزء من مرحلة الشيخوخة.

وبرضه عشان تاخد فكرة عن أعراض ألزهايمر، فهو ليه كذا مرحلة: ألزهايمر خفيف وألزهايمر معتدل وألزهايمر شديد.

الألزهايمر الخفيف بيتمثل في:

  • إن الواحد يبقى عنده طاقة أو دافع أقل لإنه يعمل أي حاجة.
  • إنه يبقى اهتمامه أقل بالشغل وبالأنشطة الاجتماعية وإنه يفضّل يقضي وقت أكبر نايم أو بيتفرج على التليفزيون أو مجرد قاعد كده.
  • إنه يبقى عنده مشاكل في اللغة زي إنه يبقى مش عارف يصيغ أفكاره في كلام أو إنه يفهم الآخرين.
  • التغيرات المزاجية وصعوبة أداء المهام العادية وصعوبة السواقة لأماكن مألوفة ليه.

الأعراض دي بيشترك فيه كمان الناس اللي عندهم مشاكل في التمثيل الغذائي أو بيتعاطوا مخدرات أو بيعانوا من ضغط أو اكتئاب أو شلل رعاش أو بياخدوا أدوية متعارضة مع بعضها.

أما الألزهايمر المعتدل، فأعراضه ممكن تتضمن:

  • كلام غير مترابط.
  • يبقى مثلًا مش عارف أماكن هو راحها قبل كده أو مش عارف إيه اللي جابه في المكان اللي هو فيه.
  • سهل إنه يتعصب ومكن تلاقيه شاط في العيلة كلها مرة واحدة.
  • يبقى عنده أوهام زي إن الشخص اللي بيرعاه عايز يؤذيه.
  • الشرود واضطرابات في النوم.

أما الألزهايمر الشديد، فبيبقى واصل لمرحلة إنه:

  • الحاضر والماضي داخلين في بعض عنده.
  • مش قادر يعبر عن نفسه أو يفتكر أو يعالج المعلومات.
  • عنده مشاكل في البلع وفي التحكم في البول والبراز.
  • بيعاني من فقدان الوزن ومن الالتهابات الجلدية والنوبات والتقلبات المزاجية الشديدة وغيره.
  • بيعاني من هلاوس وعدم القدرة على الحركة لوحده.

الخرافة الثالثة: ألزهايمر مابيؤديش للموت:

خرافات عن ألزهايمر

للأسف، ألزهايمر هو السبب السادس المؤدي للوفاة في الولايات المتحدة الأمريكية. أغلب الناس بيعيشوا من 8 لـ10 سنوات بس بعد تشخيص إصابتهم بالمرض.

المرضى ممكن ينسوا ياكلوا أو يشربوا، وممكن يكون عندهم صعوبة في البلع، وده ممكن يؤدي لنقص حاد في المواد الغذائية اللي داخلة الجسم. كمان ممكن يبقى عندهم مشاكل في التنفس واللي ممكن تؤدي للالتهاب الرئوي، وده ممكن يؤدي للوفاة. كمان ممكن السلوكيات اللي بيعملها مريض ألزهايمر تعرضه للخطر زي الشرود في مواقف خطرة.

الخرافة الرابعة: فيه علاجات بتمنع تدهور المرض:

خرافات عن ألزهايمر

د. هيثر سنيدر، من جمعية ألزهايمر، قالت إن برغم إن فيه علاجات حالية موجودة دلوقتي يتساعد على مقاومة أعراض ألزهايمر –زي إنها بتساعد في المشاكل السلوكية ومشاكل الذاكرة واللغة والتفكير- وتأثيرها بيكون مؤقت، ومش بالضرورة يكون ليها تأثير، إلا إن مفيش طريقة لحد دلوقتي لوقف المرض أو ابطاء سرعة تدهوره. وعشان كده حذرت من الأنظمة الغذائية أو المكملات اللي بتدعي إنها بتعالجه، لإن كل ده كلام في الهجايص.

الخرافة الخامسة: ألزهايمر بييجي من الألومنيوم ولقاح الأنفلونزا وحشو الأسنان الفضي والأسبارتام

خرافات عن ألزهايمر

فيه ناس بتقول إن الطبخ في حلة ألومنيوم أو الشرب في ”كان“ البيبسي الألومنيوم بيسبب ألزهايمر. مش كده بس، لأ ده فيه ناس بتقول إن الأسبارتام وحشوات الأسنان الفضية بيسبب ألزهايمر. الكلام ده كله ملوش أي دليل علمي.

كمان بيقولوا إن اللقاحات ضد الأنفلونزا بتسبب ألزهايمر. في الحقيقة، العكس هو الصحيح، لإن اللقاحات بتقلل العُرضة للإصابة وبتحسّن الصحة بشكل عام.

الخبراء لحد دلوقتي مش عارفين إيه اللي بيسبب المرض. ممكن يكون بسبب مزيج من العوامل المرتبطة بالجينات والبيئة وأسلوب الحياة. بعض الأبحاث بترجّح إنه ممكن يكون مرتبط بظروف صحية زي أمراض القلب وضغط الدم العالي ومرض السكري، ولسه النتايج مش واضحة.

د. هيثر بتقول إن النظام الغذائي الصحي والتمارين وإن الإنسان يكون اجتماعي وإنه يعمل حاجات تخلي مخه يشتغل بيقللوا عرضة الإنسان للإصابة بالمرض، بس بما إن الأبحاث لسه في مراحلها الأولانية، فمفيش وصفة معينة تتقال.


المصادر:  webmd  alz  verywellhealth  rd

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى